Tónleikarnir í Aþenu heppnuðust með besta móti. Flugum strax daginn eftir áfram til Istanbúl þar sem síðustu einkatónleikarnir okkar voru, eigum neflilega bara eftir að spila á festivölum. Það þýðir að okkar síðasta “sound-check” var í Istanbúl og þá var ekki annað hægt en að sprella smá. Allir crew-gaurarnir tóku sig til og prófuðu að vera Wonderbrass í smá stund. Margir komu á óvart með ágætis hljóðfæraleik – hægt er að sjá afraksturinn á Volta blogginu hans Jónasar.
Tónleikarnir heppnuðust annars ótrúlega vel og voru áheyrendur í miklu stuði og sungu ákaft með.

Flugum svo á mánudag hingað til Lissabon í Portúgal þar sem við spilum á Sudoeste-Festival í kvöld.

Þangað til næst…
B.

Var að lesa Moggann á netinu áðan og viti menn - Mogginn leiðrétti fréttina um Volta-túrinn! Klausan er á bls.28 að ég held.

Ætli þeir hafi lesið færsluna hér að neðan og séð að sér….?

Alltaf jafn gaman að kíkja á mbl.is og fá nýjustu fréttir. Las áðan að Volta-túr Bjarkar væri bráðum að klárast og myndi ljúka með tónleikum á Spáni um miðjan ágúst. Þetta væri endirinn á 7 mánaða túr Bjarkar um heiminn….

Ég verð nú að viðurkenna að mér finnst frekar dapurt þegar fólk er að skrifa um hluti sem það veit lítið um og nennir ekki að hafa fyrir því að kynna sér þá. Flestir vita nú að þessi túr hefur nú staðið í tæpa 18 mánuði og þetta er sko ekki í fyrsta skiptið sem það er ekki farið með rétt mál á mbl.is - tala nú ekki um málfræðivillur og stafsetningarvillur……..

Eftir þrjá frídaga í Róm má segja að við höfum gerst atvinnu túristar. Við skoðuðum allt sem “verður að skoða” þegar maður er í Róm og ég verð að segja að Sixtínska Kapellan hefur vinninginn, alveg mögnuð!
Tónleikarnir voru svo á föstudeginum og tónleikastaðurinn var frekar sérstakur. Búningsherbergi og matsalur voru bókstaflega í mílufjarlægð frá sviðinu enda stórt tónleikasvæði með þremur tónleikasölum. Tveir ósköp venjulegir, en fáránlega stórir salir, og sá þriðji, sem við spiluðum í var á milli hinna tveggja og undir berum himni. Áheyrendur voru óvenju nálægt en það skapaði bara enn meiri stemningu.

Á laugardaginn var svo tekin lest til Verona þar sem næstu tónleikar voru í Arenunni (gamalt hringleikjahús). Það er ótrúlega flottur staður til að spila á! Á sumrin eru sýndar óperur á hverju kvöldi þ.á.m. Aida, og vorum við umkringd leikmyndinni úr henni baksviðs.
Við náðum að gera ótrúlega margt í Verona. Fórum öll saman út að borða, crew og band, á frábæran veitingastað sem Valdís skipulagði. Okkur var boðið í vínkjallarann í fordrykk og þar sáum við vínflösku með Diddú. Svo í matnum kom eigandi staðarins með vínflösku með mynd af B. Á tónleikadaginn fórum við í heimsókn til vinafólks Valdísar og Salóme sem buðu okkur í garðinn sinn í hádegismat, það var ótrúlega gaman – ekta ítalskur garður með vínvið, ólífutrjám, limetrjám o.fl.

Daginn eftir tónleikana flugum við svo til Aþenu í Grikklandi þar sem við munum spila í kvöld í Ólympíuhöllinni – hún er víst fáránlega stór!

Þar sem myndavélin  mín vill ekki enn virka get ég ekki sett inn myndir í bili. Ég held að hún sé barasta ónýt……..

Bless í bili…
B.

Tónleikarnir okkar á Melt Festival í Berlín voru sko heldur betur þýskir. Sviðið var umkringt risastórum krönum og vinnuvélum úr gæða “þýsku stáli” og frekar hrátt umhverfi. En það spillti ekki fyrir, var eiginlega bara frekar sjarmerandi að spila í svona öðrivísi umhverfi. Tónleikarnir heppnuðust mjög vel og áheyrendur létu heyra í sér. Flugum svo hingað til Rómarborgar í gærmorgun. Við fáum nokkra frídaga hér sem er frábært og núna tekur maður túristann á þetta - Vatíkanið, spænsku tröppurnar, hringleikjahúsið, sixtínsku kapelluna o.s.frv. Næstu tónleikar eru svo á föstudaginn.

Þangað til næst…

B.

p.s. ég fann iPodinn minn…..sem betur fer

Við spiluðum á miðvikudagskvöld í Arena í Riga. Tónleikarnir heppnuðust alveg ótrúlega vel og það var góð stemning meðal áheyrenda. Flugum strax morguninn eftir til Berlínar og bíðum eftir að spila næsta gigg sem er á morgun, sunnudag. Þá er BG aðalnúmerið á Melt Festival. Á undan okkur spila svo Battles og Hot Chip, þeir spiluðu líka á sama festivali og við í Ástralíu og Nýja Sjálandi, það verður gaman að hitta alla aftur.

Annars er bara búið að vera rólegt hér í Berlín, veðrið hefði reyndar getað verið aðeins betra en ég kvarta svo sem ekki. Fórum í gær í skemmtilegan hluta bæjarins þar sem var nóg af svokölluðum “bjórgörðum”, kaffihúsum, veitingastöðum og auðvitað búðum. Þar eru líka margir “passamynda”sjálfsalar þar sem við stelpurnar hreinlega misstum okkur.

Á morgun er svo tónleikadagur og fer slatti af honum í að sitja í rútu - það tekur neflilega um 2klst. að keyra á tónleikastaðinn - en maður er svo sem orðinn vanur því að sitja í rútu….

Þangað til næst…

B.

Tónleikarnir í Vilníus heppnuðust vel. Við spiluðum meira að segja nýtt lag - Overture sem er úr myndinni Dancer in the Dark - það er alveg ótrúlega fallegt og ótrúlega gaman að spila það!

Veðrið lofaði ekki góðu rétt fyrir tónleika, þrumur&eldingar og massíf rigning, en það rættist úr því rétt fyrir tónleika. Spiluðum á ótrúlega fallegum stað úti í skógi. Þetta var risastór (komma)stúka með risastórum grasbletti - var notað á sínum tíma í skrúðgöngur, sýningar, ræðuhöld og fleira skemmtilegt pólitískt dótarý. Áhorfendur voru víst um 10.000 sem verður nú bara að teljast gott

Í dag var keyrt af stað og næsti áfangastaður Riga, Lettland. Og auðvitað var rigning. Ekki nóg með að sitja í um 5 klukkutíma í rútu með þrjóskum litháenskum/rússneskum/lettneskum rútubílstjóra, sem mátti alveg við smá upprifjun á meiraprófinu sínu, heldur tókst mér að týna iPod-num mínum einhversstaðar á leiðinni og myndavélin mín ákvað allt í einu að hætta að virka…………bömmer!

Vegna hálsbólgu þá aflýsti BG tvennum tónleikum, Bretlandi og Finnlandi, og fengum við því meiri tíma heima sem var bara hið besta mál. Við lögðum hins vegar af stað í morgun og flugum til Helsinki og svo áfram til Vilnius í Litháen, þar sem næstu tónleikar verða á sunudagskvöld. Ferðalagið gekk ágætlega og náðu flestir að versla sér eitthvað í Múminálfa búðinni á flugvellinum í Helsinki - alveg must að kaupa eitthvað Mumin…

Veðrið hér er mjög gott, sól og blíða og hitastigið mjög þægilegt - þá er ekkert annað að gera en að skella sér út að skokka…

B.

Ég verð að viðurkenna að ég var komin með pínu leið á að blogga enda liðið rúmt ár síðan að túrinn hófst. En ég ætla að reyna að koma mér af stað aftur enda nóg að segja frá þessa dagana.

Bretlandstúrinn heppnaðist vel en endaði þó frekar furðulega þar sem BG varð að hætta við síðustu tónleikana vegna háls- og eyrnabólgu. Við vorum allar tilbúnar í Sheffield til að fara í sound-check en svo bara þurfti að hætta við allt saman, pakka saman og halda upp í rútu.

Við komum sem sagt heim í byrjun maí og erum búnar að vera í fríi í næstum tvo mánuði, sem var hið besta mál Reyndar vorum við Wonderbrass píur að spila á fullu sjálfar, komum fram á Norræna Hornaþinginu sem haldið var hér á landi o.fl.

Síðasta þriðjudag hófst svo síðasti Volta túrinn. Núna er það aftur Evrópa eins og síðasta sumar, nema nú verður farið aðeins austar en síðast. Við byrjuðum í París í síðustu viku þar sem tónleikarnir voru teknir upp á video. Síðan komum við heim og spiluðum á tónleikum hérna í Grasagarðinum ásamt Sigur rós og Ólöfu Arnalds eins og kannski flestir vita. Það var ekkert nema stuð

Hver veit nema að ég skelli inn myndum næst…

B.

Eftir vel heppnaða tónleika á föstudagskvöld tók við 4klst. rútuferð til London á laugardeginum.

Við höfðum tekið eftir því að það var ansi mikið um Íslendinga á hótelinu okkar í Manchester og við skildum ekkert í þessu, alls staðar þessir Íslendingar. Svo þegar við vorum á leiðinni niður í lyftunni á hótelinu birtist enginn annar en Þorsteinn Joð. Ekki nóg með það heldur mætti ég svo Árna blessaða Johnsen þegar niður í móttökuna var komið. Á endanum fengum við svo skýringu á þessu öllu saman. Særún hafði spjallað smá við Þorstein og spurt hann út í þetta. Þá var svona mikið af Íslendingum þarna því að það var fótboltaleikurinn Man.Un. - Arsenal á laugardeginum og auðvitað fullt af íslendingum mættir til að fara á hann.

Spiluðum svo fyrstu tónleikana af þremur hér í London á mánudagskvöld og þeir heppnuðust vel. Það var reyndar ógurlegur hávaði á tónleikunum, þessi salur ekki alveg að gera sig. Vonandi verður þetta skárra á tónleikunum á morgun. 

Bless í bili…

B.